
第一世噶玛巴教言集1KM26རྟ་མགྲིན་གྱི་རྒྱ་གཞུང་བཞུགས་སོ། །
1-2-177b
༄༅། །རྟ་མགྲིན་གྱི་རྒྱ་གཞུང་བཞུགས་སོ། །
༄༅། །རྟ་མགྲིན་གྱི་རྒྱ་གཞུང་བཞུགས་སོ། །རྒྱ་གར་སྐད་དུ། ཤྲཱི་ཧ་ཡ་གྲྀ་ཝ་སཱ་དྷ་{ན་}[*]ནཱ་མ། བོད་སྐད་དུ། དཔལ་རྟ་མགྲིན་གྱི་སྒྲུབ་ཐབས་ཞེས་བྱ་བ། བཅོམ་ལྡན་འཇིག་རྟེན་དབང་ཕྱུག་ལ་ཕྱག་འཚལ་ལོ། །བདག་ལ་གནོད་པའི་བྱ་བ་རྣམས་སྤངས་ནས། །རང་བཞིན་བརྟེན་པས་དབེན་པའི་ཕྱོགས་སོང་ནས། །གནས་དེར་བསམ་གཏན་ཁང་པ་ཤིན་ཏུ་ཡིད་འཐད་པར། །འོག་གི་ས་གཞི་རབ་ཏུ་འཐས་པར་བརྡུངས་པ་ལ། །
1-2-178a
༄༅། །ས་ལ་མ་ལྷུང་བ་ཡི་གཅི་བ་དྲི་བཟང་རྣམས་དང་ནི། །བསྲེས་ལ་ལེགས་པར་བྱུགས་ལ་གཟུགས་བརྙན་འཆར་བ་ལྟ་བུར་བྱ། །དེ་ནས་དྲི་ཞིམ་དག་གི་མེ་ཏོག་གཏོར་ལ་རྒྱན་རྣམས་བཀྲམ། །དཀྱིལ་འཁོར་དག་ཏུ་ཞུགས་ཤིང་དམ་ཚིག་ལྡན་པ་ཡི། །ཡང་ན་སོ་སོར་ཐར་བའི་སྡོམ་པར་གནས་པའི་སེམས། །བསྐྱེད་ནས་བདེ་བའི་སྟན་ལ་གནས་པའི་སྐད་ཅིག་ལས། །རྟ་མགྲིན་བླ་མ་ལ་ནི་བདུན་པོ་ཡོངས་དག་བྱ༑ ༑དེ་རྗེས་ཚད་མེད་བཞི་ཡིས་བདག་བློ་ལེགས་པར་སྦྱང་། །ཧཱུ་ནྱ་ཏའི་སྔགས་ཀྱིས་སྟོང་པ་ཉིད་དུ་བསྒོམ། བདག་ཉིད་རྣམ་ཤེས་པཾ་དུ་བལྟས་ཏེ། ཡོངས་སུ་གྱུར་པ་ལས་པདྨ་འདབ་མ་བརྒྱད། པདྨའི་ལྟེ་བར་ཨཱཿལས་ཟླ་བའི་དཀྱིལ་འཁོར། མ་ལས་ཉི་མའི་དཀྱིལ་འཁོར་བསམ། དེའི་སྟེང་དུ་ཧཱུྃ་བསམ། ཧཱུྃ་རྡོ་རྗེར་གྱུར། དེའི་ལྟེ་བར་ཧཱུྃ་གིས་མཚན་པར་བསམ། དེ་ལས་འོད་ཟེར་འཕྲོས་པས་རྡོ་རྗེའི་ས་གཞི་ར་བ་གུར་དུ་གྱུར་པར་བསམ། རྡོ་རྗེ་ཧཱུྃ་བཅས་དེ་ལས་འོད་ཟེར་འཕྲོས་པས། གཞལ་ཡས་ཁང་དུ་བསྐྱེད། དེའི་ནང་དུ་རྡོ་རྗེ་ཧཱུྃ་དང་བཅས་པ་ལས། བདག་ཉིད་ཁྲོ་བོ་རྟ་མགྲིན་གྱི་སྐུར་གྱུར་ཏེ། དམར་པོ་ཞལ་གསུམ་ཕྱག་བཞི་པ། །དབུས་མར་གཡས་སྔོ་གཡོན་དཀར་བ། །དབུས་མའི་གཙུག་ན་རྟ་མགོ་ལྗང་གུ་ཕྱུང་། །གྱེན་དུ་ཁ་ལྟས་རྟ་སྐད་འབྱིན། །གཡས་དང་གཡོན་གྱི་དང་པོ་ནི། །རྡོ་རྗེ་པད་མ་བསྣམས་པའོ། །མཐའ་མ་
1-2-178b
གཉིས་ཀྱིས་མདའ་གཞུ་འགེངས། །རིགས་ལྔའི་བདག་ཉིད་དབུ་ལའོ། །དབུ་སྐྲ་ཁམ་ནག་གྱེན་དུ་བརྫེས། །ཐོད་པའི་ཕྲེང་བས་རབ་ཏུ་བརྒྱན། །ཡན་ལག་དྲུག་ལ་སྦྲུལ་གྱིས་བརྒྱན། །སྐུ་སྨད་སྟག་གི་ལྤགས་པས་གཡོགས། །ཞབས་བཞི་ཡིས་ནི་འཇིག་རྟེན་གྱི། །ལྷ་ཆེན་བཞི་ནི་རབ་ཏུ་མནན། །མེ་དཔུང་འབར་བའི་དབུས་ན་བཞུགས། །དཀྱིལ་འཁོར་གྱི་ནི་ཕྱོགས་བཞི་ན། །ཤར་དུ་རྡོ་རྗེ་ལས་བྱེད་མ། །ཞལ་གཅིག་ཕྱག་གཉིས་སྔོན་མོར་བསྒོམ། །ལྷོར་ནི་གཤིན་རྗེ་ལས་བྱེད་མ། །ཞལ་གཅིག་ཕྱག་གཉིས་ནག་མོ་བསྒོམ། །ནུབ་ཏུ་ཀླུ་ཡི་ལས་བྱེད་མ། །ཞལ་གཅིག་ཕྱག་གཉིས་དཀར་མོར་བསྒོམ། །བྱང་དུ་གནོད་སྦྱིན་ལས་བྱེད་མ། །ཞལ་གཅིག་ཕྱག་གཉིས་ལྗང་གུ་བསྒོམ། །གཡས་པ་ཀུན་ན་གྲི་གུག་སྟེ། །གཡོན་པ་ཀུན་ན་ཐོད་ཁྲག་གཉིས། །དཀྱིལ་འཁོར་ལོ་རྫོགས་ནས་ནི། །ཡེ་ཤེས་སེམས་དཔའ་བཀུག་ལ་གཞུག །ཛ་ཧཱུྃ་བྃ་ཧོཿ ལྷ་ཡི་འཁོར་ལོ་བསྒོམས་ནས་ནི། །ལས་རྣམས་འདོད་ན་བཟླས་པ་བྱ། །ཨོཾ་ཧ་ཧ་ཧི་ཧི་ཧྲི་ཧྲི་ཧཱུྃ་ཧཱུྃ་ཕཊ་ཕཊ། བསྙེན་པ་གྲངས་བཞིན་བཟླས་ནས་ནི། །ལས་བྱེད་རྣམས་ཀྱི་མཚན་སྔགས་བཟླས། །བཛྲ་ཤྭ་ན་ས་མ་ཡ། ཡ་མ་ཤྭ་ན་ས་མ་ཡ། ནཱ་ག་ནྭ་ན་ས་མ་ཡ། ཁ་རག་ཤྭ་ན་ས་མ་ཡ། གཙོ་འཁོར་ལས་ལས་ལ་སྦྱོར་བའི་སྔགས། རྒྱལ་འགོང་རྒྱལ་པོའི་ཚེ་ལ་མ་ཤ་དོ། རོ་ལ་ཁྲག་འཐུང་སྙིང་ཁྲག་བཛྲ་ས་ཏུ་ས་མ་ཡ་ཛཿ 
1-2-179a
༄༅། །བཛྲ་ཛི་དྲག་རག་ཏ་འབྱུང་པོ་མཱ་ར་ཡ་ཛ་ཛ༔ སྙིང་ཁྲག་ཧཱུཾ་བཾ་ཧོ༔ བཛྲ་ཨ་གུ་ཤ་ཛ་ཛ༔ འབྱུང་པོའི་ཚེ་ལ་མ་ཤ་དོཾ། རོ་ལ་ཁྲག་འཐུང་། སྙིང་ཁྲག་འབྱུང་པོ་འབྱུང་མོ་པྲ་ཏི་པྲ་མོ། ཚེ་ལ་མ་ཤ་དོཾ། རོ་ལ་ཁྲག་འཐུང་སྙིང་ཁྲག་མ་ལ་ལ། ཡེས་ཡེས། བྷྱོ་བྷྱོ། ཀྲོཾ་ཀྲོཾ་ས་ན། ཨོཾ་བཛྲ་ཀྲོ་ཏ་ཧྱ་གྲྀ་ཝ་ཧུ་ལུ་ཧཱུ་ལུ་ཧཱུྃ་ཕཊ། ཨོཾ་ཏ་ཀི་ཙ་ཏི་བྱི་ཙ་ཏི་ཧུ་ཡ་ཧུ་ཡ། ཧུ་ལུ་ཧུ་ལུ། སུ་ཏུ་ཏེ་སུ་ཏུ་ཏེ་སྭཱ་ཧཱ་ཧཱུྃ་ཕཊ། རྩ་བའི་སྔགས་དང་སྙིང་པོ་དང་། །ཉེ་བའི་སྙིང་པོ་ལས་ཀྱི་སྔགས། །ཇི་ལྟ་བའི་རིམ་པ་ནི། །བླ་མའི་ཞལ་ལས་ཤེས་པར་བྱ། །ཉ་ཤ་སྒོག་ཙོང་སྤངས་པ་ཡི། །མཆོད་སྦྱིན་གཏོར་མ་རྒྱ་ཆེན་པོ། །ལྔ འམ་ཡང་ན་གཉིས་གཉིས་བཏང་༑ ༑ཇི་ལྟར་འདོད་པའི་དོན་ལ་གསོལ་བ་གདབ། །དགེ་བ་བླ་མེད་བྱང་ཆུབ་རྒྱ་ཆེན་བསྔོ། །དཔལ་རྟ་མགྲིན་གྱི་སྒྲུབ་ཐབས་རྫོགས་སོ། །རྒྱ་གར་གྱི་མཁན་པོ་དཔལ་མེ་མཛད་ཀྱིས་མཛད་པ་རྫོགས་སོ། །བོད་ཀྱི་ལོ་ཙཱ་བ་བྷི་ཀྵུ་ཤཱི་ལ་ཛི་ཏས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།


目录
རྟ་མགྲིན་གྱི་རྒྱ་གཞུང་བཞུགས་སོ། །